पहिरो पीडितका लागि १ लाखको कोष

सहयोग गर्न देशभरीको कमिटीलाई संगठनको आग्रह
२८ साउन २०७१
काठमाण्डौं । पहिरोमा परि ज्यान गुमाएका आफ्ना यातायात मजदुरहरुको परिवारलाई राहतका लागि नेपाल यातायात स्वतन्त्र मजदुर संगठनले १ लाख १ हजार १ सय ११ रुपैयाको राहत कोष स्थापना गरेकोछ ।
    सिन्धुपाल्चोकको माङखा र राम्चेको सिमास्थित जुरे ड्याम साईटमा साउन १७ गते शनिबार विहान पहिरोमा परि मृत्यू भएका यातायात मजदुर परिवारलाई सहयोगका लागि नेपाल यातायात स्वतन्त्र मजदुर संगठन अरनीको रुट ट्रक ईकाईले राहत कोषको स्थापना गरेको हो । संगठन केन्द्रीय कमिटी सहितको सहयोगमा स्थापना भएको कोषमा देशभरीका कमिटीहरुको समेत सहयोगलाई संकलन गरी पीडित परिवारलाई हस्तान्तरण गरिने संगठनले जनाएकोछ । पहिरोमापरि चार जना चालक तथा २ जना परिचालकहरुको मृत्यू भएको थियो भने ४४ जना यातायात मजदुर परिवारहरुको मृत्यु भएको र दश जना घाईते भएको थियो ।
   मृत्यू हुने चालकहरुमा गणेशलाल श्रेष्ठ, श्याम श्रेष्ठ, लालवहादुर तामाङ र सुर्य तामाङ रहेका छन् भने परिचालकहरुमा सुरेश तामाङ र सुजन तामाङ रहेका छन् । संगठनका सदस्य तथा मृतक यातायात मजदुर परिवारलाई राहतका लागि कोषको स्थापना गरिएको अरनीको ट्रक रुट ईकाईका अध्यक्ष दुर्गावहादुर श्रेष्ठले बताए साथै देशभरीबाट सहयोग गर्न चाहनेहरुका लागि नेपाल यातायात स्वतन्त्र मजदुर संगठन केन्द्रीय कमिटीको सहयोगमा खोलिएको राष्ट्रिय बाणिज्य बैंक बालाजु शाखाको हिसाव नम्बर ७६६७ मा सहयोग गर्न समेत अनुरोध गरेका छन् ।
   ६ जना साथीहरुको मृत्यु भएकोछ ४४ जना परिवारको समेत मृत्यु भएकोछ कतिपय साथीहरुले पुरै परिवार तथा भएभरका घर जग्गा गुमाएका छन् यस्तो वेलामा सहयोग गर्नु  हामी सवैको कर्तव्य रहेकाले देशभरीका संगठन परिवार तथा अन्य दयावानहरुलाई सहयोग गर्न नेपाल यातायात स्वतन्त्र मजदुर संगठनका महासचिव भीमज्वाला राईले आग्रह गरेका छन् ।