मधेशको हात पहाडलाई साथ

भीमज्वाला राई

विनोद भन्छन् ″पहाडलाई नजिकबाट बुझ्ने अबसर मेरा लागि जिफन्टले जुराई दियो”  

काठमाण्डौं । विरगञ्ज पर्साका विनोद महतो र पर्सा श्रीपुरका रामप्रकास थारु काभ्रेपलान्चोक जिल्लाको गैरीबिसौना ६ स्थित देउपुरको ब्रह्मायणी माविको भत्कीएको भवन सफाई गर्दैगर्दा भेटिए । 

 दुवैजना एकै स्थान र एउटै काममा दत्तचित्त भएर भग्नावशेष पन्छाईरहेका थिए तर फरक फरक जिम्मेवारी र फरक भूमिकामा ।

नेकपा एमालेले सञ्चालन गरेको पुन निर्माणको एक महिने अभियान अन्तरगत नेपाल टङेड युनियन महासंघ जिफन्ट आवद्ध समग्र उद्योग टङेड युनियनको केन्द्रीय सदस्यका रुपमा विनोद महतो अभियानमा थिए भने नेपाली सेनाका जवानका रुपमा रामप्रकास थारु सहभागी थिए । 

 विद्यालयको ३ वटा भवनहरु भुकम्पका कारण भत्कीएर विद्यालय सञ्चालनमा समस्या भएपछि विद्यालय व्यवस्थापन समितिका अध्यक्ष टोलप्रसाद दुलालको अनुरोधमा जिफन्टको स्वयमसेवक समुह र नेपाली सेनाका जवानहरुले सयुक्त रुपमा भग्नावशेष हटाउन जुटेका थिए । 

 उनीहरु दुवैको उदेश्य पहाडी जिल्लाहरुमा भुकम्पले निम्त्याएको संकटमा  जनताको पीडामा मलहमपट्टी गर्नु तर दुवैका लागि यो काम सहज थिएन । उनीहरु दुवै पहाड नचढेका, पहाडको हावा पानी, दुख र संस्कृति बारे अनभिज्ञ दिए ।

  दुवैजनाका लागि पहाडको अवस्था बुझ्ने महत्वपूर्ण अवसर बनेको थियो यो संकटको घडी । बेल्चा हान्दै गरेका विनोदले टक्क रोकिएर निधारको पसिना पुछ्दै भने यस्तो दुर्गम पहाड कहिल्यै चढेको थिईन जिफन्टको कार्यकर्ताको नाताले जिफन्टले सञ्चालन गरेको अभियानका कारण सेवा गर्न आउने अवसर पांंए यो मेरो लागि अहोभाग्य हो ।

 सडक, विजुली, पानी, स्वास्थ्य, खाद्यान्न तथा लत्ता कपडा सबै मधेशमा पहाड भन्दा सहज छ मधेशका जनता सुखी छन् । त्यही मधेशमा जन्मीएको म जस्तै धेरै मधेशीहरुले पहाडलाई बुझ्नु पर्ने आवश्यक देख्छु । पहाडलाई नजिकबाट बुझ्ने अबसर मेरा लागि जिफन्टले जुराई दियो विनोदले भने । 

 पार्टीले सञ्चालन गरेको पुन निर्माण अभियानमा विनोदलाई जिफन्टले जेठ १५ गतेदेखि २६ गतेसम्म काभ्रेको गैरिबिसौना देउपुर खटाएको छ । उनी भन्छन् मलाई पहाडमा पठायो सानो अंशमै भएपनि मधेशको हात पहाडलाई साथ बनाउन पांए धेरै खुशी छु । 

  त्यस्तै नेपाली सेनामा ८ वर्षे सेवा अवधिमा सुगम पहाडहरु पुगेको भएपनि दुर्गम र प्राकृतिक विपदले ध्वंश भएको स्थानमा पुन निर्माणका लागि भने आफुलाई समर्पित गर्न सकेको थिईन यो सहयोग र सेवा मेरालागि अविस्मरणिय भएको सेनाका जवान रामप्रकास थारुले बताए । 

  गैरिबिसौना अस्थाई क्याम्पमा थारु बस्दै आईरहेको छ क्याम्पले गाउंमा जनतालाई सहयोग गर्दै आईरहेको छ भने जिफन्टले सो गाविसमा आफ्ना ५० जना नेता कार्यकर्ताहरुलाई विपदमा परेका जनताका घर टहरा, विद्यालय निर्माण तथा जोखिमपूर्ण घरहरु भत्काउनका लागि दशदिन परिचालन गरिरहेको थियो । 

  विनोदसंगै थिए विरगञ्जस्थित नेपाल फर्मास्युटिकल्स प्रालिमा काम गर्ने भूपेन्द्र चौधरी र सुबोध चौधरी । उनीहरुले एक स्वरमा भने पहाडमा दुखपर्दा थोरै दिन भएपनि सहयोगी बन्ने अवसर पायौं । 

 मधेशका हामीलाई यंहां काम गर्न असहज हुनु स्वभाविक हो तर नेपाल तराई मात्रै होईन भन्ने बुझ्न र बुझाउन हामीलाई मद्दत पुगेको उनीहरुले बताए ।