चालकलाई अनुशासित बनाउन अभियान

२४ अशोज २०७१
काठमाण्डौं । बढ्दो सडक दुर्घटना र सडक दुर्घटनामा चालकलाई दोषी देखाईएपछि चालकहरुलाई सजग गराउन तथा दुर्घटनामा कमी ल्याउन नेपाल यातायात स्वतन्त्र मजदुर संगठनले अभियान सञ्चालन गरेको छ ।
   सडक दुर्घटना न्युनिकरण गर्ने अभियान अन्तरगत नेपाल यातायात स्वतन्त्र मजदुर संगठनले काठमाण्डौं स्थित त्रिभुवन अन्तराष्ट्रिय विमान स्थल प्रवेशद्धार अघि शुक्रबार विहान चालकहरुका लागि प्रशिक्षण कार्यक्रम गरेको छ ।
     विमानस्थल प्रवेशद्धार अघि टेण्टमा चालकहरुलाई भेला गराई दुर्घटनाका कारणहरु, दुर्घटनाका असर तथा न्युनिकरणमा चालकहरुको भूमिकाका विषयमा प्रशिक्षण प्रदान गरिएको हो । ट्राफिक प्रहरी महाशाखाका प्रहरी निरिक्षक विपिन गौतम तथा ट्राफिक प्रहरी वृत गौशालाका प्रमुख तथा प्रहरी निरिक्षक शुकदेव खनालले सहभागी १ सय २० जना चालकहरुलाई प्रशिक्षण दिईएको थियो ।
    प्रशिक्षणमा करिव ५० जना अन्य सर्वसाधारणलाई समेत सहभागी गराईएको थियो । दुर्घटना हुनुमा अन्य थुप्रै कारणहरु हुदां हुंदै यातायात मजदुरहरुलाई मात्र दोषी देखाउने गरिएको छ त्यसलाई खण्डन गर्दै तथ्य सार्वजनिक गर्न अभियान सञ्चालन गरिएको संगठनका महासचिव भीमज्वाला राईले बताए ।
अनियन्त्रीत सवारी आयात, सिमित, सांघुरा र जिर्ण सडक, यातायात व्यवस्थापन तथा सञ्चालनमा राज्यको नीति नहुनु पनि दुर्घटनाको कारणहरु हुने गरेको भएपनि चालकलाई मात्र दोषी देखाउनु अव्यवहारिक भएको महासचिव राईल बताए ।
  दुर्घटना न्युनिकरण गर्न सरोकारवालाहरु सवैको भूमिका हुनु पर्ने बताउदै मजदुरहरुलाई जिम्मेवारीपूर्ण बनाउन ट्राफिक प्रहरीहरुसंगको सहकार्यमा संगठनले अभियान सुरु गरेको राईले बताउए । अन्तराष्ट्रिय यातायात मजदुर महासंघ आईटीएफको कार्यसप्ताहव्यापी कार्यक्रमसंगै जोडेर यो अभियानलाई देशभरी सञ्चालन गर्ने पनि राईले बताए । 
     अभियानसंगै कार्यथलोमै पुगी मजदुरहरुलाई संगठनको सदस्यता प्रदान गर्ने योजना अनुरुप शुक्रबार ८२ जना यातायात मजदुरहरुलाई नेपाल यातायात स्वतन्त्र मजदुर संगठन बागमती अञ्चल कमिटीले संगठनको सदस्यता प्रदान गरेको छ ।
   संगठनका केन्द्रीय उपाध्यक्ष मांयां वेगाको प्रमुख आतिथ्यमा भएको कार्यक्रमको अध्यक्षता संगठन एयरपोर्ट ट्याक्सी ईकाईका अध्यक्ष शंकर थापा, सञ्चालन नरवहादुर रानाभाटले गरेका थिए ।
कार्यक्रममा संगठन बागमती अञ्चल अध्यक्ष नवराज घिमिरे, उपाध्यक्ष बिी केसी, सचिव जिवन खड्का लगायत अञ्चलका विभिन्न कमिटीका नेताहरुको सहभागी रहेको थियो ।