यौन पिपासु प्रिन्सिपलको कर्तुत खुल्दै

यौन पिपासु प्रिन्सिपल कपिङ कपुर  र नाराम्इम्मानुएल इन्टरनेशनल बोडिङ  स्कुल 

बिना अनुमति विद्यालय सञ्चालन,  विना तलव शिक्षक, शिक्षिका काम गर्न बाध्य

धरान । धरान १९ जिमि लाईस्थित इम्मानुएल इन्टरनेशनल बोडिङ स्कुलका यौन पिपासु प्रिन्सिपल कपिङ कपुर नाराम्को एकपछि अर्को कर्तुत खुल्दै गईरहेको छ ।
        छात्राहरुलाई यौनशोषण गर्ने गरेको तथ्य सार्वजनिक भएसंगै सो स्कुल समेत गैर कानुनीरुपमा सञ्चालन भईरहेको र विद्यालयका शिक्षक शिक्षिकाहरुलाई तलव नदिई काममा लगाउने गरेको पाईएको छ । छात्राबासमा रहेका छात्राहरुलाई लठ्याउने औषधि खुवाएर वर्षौदेखि यौनशोषण गर्दै आएको पीडित छात्राहरुले सोमबार खुलासा गरेका थिए । पीडित छात्राहरुले आफूहरुलाई संवेदनशील अंगमा हात हाल्ने अंगालो हाल्ने गरेको बारम्बार यौनशोषण गर्ने गरेकोसमेत छात्राहरुले जानकारी गराएका थिए । हाल स्कुलमा ३१ छात्रसहित ५३ जना विद्यार्थी अध्ययनरत छन् । ९ देखि १६ वर्षसम्मका विद्यार्थीहरु अध्यानरत छन् ।
सन् २००० अर्थात शैक्षिक सत्र २०५७÷०५८ सालमा प्राविको अनुमति लिए पनि निमावि अर्थात कक्षा ७ सम्म विद्यार्थीहरुलाई पठनपाठन गर्दै आएको पाइएको छ । जिल्ला शिक्षा कार्यालयका अनुसार २०५७ कात्तिक ७ गते माविका लागि अनुमति माग गरे पनि विद्यालयको अवस्था मूल्याकंन गरी प्राविसम्ममात्रै प्रदान गरेको तथ्यांक छ ।
हालसम्म पनि विद्यालयले प्राविदेखि निमावि बनाउनका लागि निवेदन नदिएको धरानका स्रोत व्यक्ति महेन्द्र कायस्थ बताउँछन् । प्राविको लागि अनुमति लिएको विद्यालयले छात्रावासको लागि पनि अनुमति लिएको अवस्था छैन् । स्रोत व्यक्ति कायस्थले भने–‘विद्यालयमा छात्रावास संचालन गर्दा अनुमति लिनुपर्छ । तर, त्यो लिएको पाइदैन ।
उनले एउटै कोठामा २५ जना छात्राहरुलाई राख्ने गरेको पाइएको छ । त्यस्तै कक्षा कोठाको पनि दुर्गन्धित र फाहोर साथै विद्यार्थीहरु बस्न सक्ने अवस्थाको थिएन् । विद्यार्थीहरुले आफैले खाना पकाउने साथै लुगा धुनु पर्ने बाध्यता भएको बताएका थिए । उनीहरुले चामल भए पनि तरकारीहरुको व्यवस्था नहुने गरेको कक्षा सातमा अध्ययनरत एक भारतीय विद्यार्थीले भनेका थिए । हाल त्यहा ६ भारतीयसहित अन्य नेपाली विद्यार्थीहरु अध्ययनरत छन् ।
म्याद थपेर कारबाही सुरु
छात्राहरुको उजुरीका आधारमा सोमबार पक्राउ परेका प्रिन्सिपललाई मंगलबार प्रहरी थप अनुसन्धान गर्नु पर्ने भन्दै म्याद थप गरेको छ ।  अनुसन्धान गर्नुपर्ने भएपछि उनलाई म्याद थप गरिएको इलाका प्रहरी कार्यालय धरानले जनाएको छ भने पक्राउ परेकी उनकी श्रीमती रेदिला कपुर नाराम्लाई हाजिर हुने शर्तमा छाडिएको छ । श्रीमती रेदिलाविरुद्ध जाहेरी नपेरपछि उनलाई हाजिर हुने शर्तमा छाडिएको इप्रका धरानका प्रहरी नायव उपरीक्षक चन्द्रदेव राईले बताए ।
  
समाजलाई बदनाम गराउने र नराम्रो कार्य गरेको भन्दै धरान १९ का स्थानीयवासी युवाहरुले विद्यालय सो स्थानमा राख्न नदिने भएका छन् । गैर नागरिकले संचालनमा ल्याएको विद्यालय त्यसमा पनि विद्यार्थीहरुमाथि हुने अमानवीय व्यवहारले समाज विग्रिने भन्दै विद्यालय राख्न नदिने भएको स्थानीय युवा विरेन लिम्बूले बताए । युवाहरुले अन्य विद्यार्थीहरुको लागि पनि छुट्टै व्यवस्था गर्ने सोचमा उभिएका छन् ।

    विना तलव शिक्षकहरु

स्कुलमा कार्यरत शिक्षकहरु बिना तलव काम गराउने गरेको पाइएको छ । त्यहा कार्यरत ६ जना शिक्षकहरुलाई नै बिना तलव काम गराउने गरेको गुनासो गरेका छन् ।
दुई स्थानीयसहित ६ शिक्षकहरुले हालसम्म तलव नपाएको बताएका छन् । दुइवर्षदेखि कार्यरत भारत मणीपुरकै एक शिक्षकले आफूले हालसम्म तलव नपाएको गुनासो पोखे । उनले स्वयंसेवकको रुपमा मात्रै काम गराउने गरेको बताएका छन् । ‘अहिलेसम्म तलव पाएको छैन’–उनले भने । त्यस्तै नाम नखुलाउने शर्तमा स्थानीय शिक्षिकाले पनि कसैलाई पनि तलव नदिने गरेको बताइन् ।
उनले स्वयंसेवकको रुपमा कार्य गर्नु पर्ने बाध्यता रहेको बताइन् । ‘तलवको रुपमा भन्दा पनि स्वयंसेवको रुपमा मात्रै शिक्षक राखिएको छ’ उनले भनिन्–‘कहिलेकाही पकेट खर्चका लागि मात्रै दुई–तीन हजार दिने गथ्र्यौ ।’ तलव नदिएकै कारण पनि धेरै शिक्षकहरुले छाडेर जाने गरेको उनीहरुको भनाइ छ । संचालनदेखि हालसम्म करिव ५० जना भन्दा बढी शिक्षकहरु विना तलव काम गरेको विद्यालयका जानकार बताउँछन् । क्रिश्चियन मेसिनरी स्कुल भएकाले पनि ३–४ महिनाका लागि भारतबाट शिक्षकहरु आउने अध्यापन गराउने अनि फर्कने गरेका छन् ।
विशेष गरी भारत बैंकलोरको विविसी क्रिश्चियन सोसाइटीबाट दक्षिण भारतीय शिक्षकहरु आउने गरेका छन् । सधैभरीका लागि भारतको मणीपुरबाट ल्याए पनि उनीहरुलाई खानमात्रै दिने गरेको एक जानकारले बताए ।

 को हुन कपिङ

सन् २००० मा स्कुल अनुमति लिएपछि भारतको मणिपुर प्रान्तबाट ल्याइएका शिक्षक हुन् कपिङ कपुर नाराम् । उनले बैंगलोरबाट डेभिनिटीमा स्नात्तकोत्तर गरेका छन । क्रिश्चियन समाजका उनी बैंगलोर विविसी क्रिश्चियन सोसाइटीबाट संचालित व्यक्ति हुन् ।
उनले सोही सोसाइटीमार्फत् अनुदान लिएर स्कुललाई संचालनमा ल्याएका हुन् । तर, संचालन पूर्व त्यस स्कुललाई भारत मणीपुर मिजुराङका जोन माराम्ले धरान–७ शान्तिपथमा दुई कोठा लिएर सन् १९९९ मा संचालमा ल्याएका थिए । तर, उनी पनि विद्यार्थीहरुमाथि दुव्र्यबहार गरेको थाहापाएपछि क्रिश्चियन समाजहरुले नै उनलाई विदाई गरेपछि कपिङ आएका थिए । त्यसपछि धरान–८ स्थित सिदार्थ मार्गमा स्कुल स्थापना गरियो ।
कपिङले सन् २००० देखि सुनसरी जिल्ला शिक्षा कार्यालयबाट अनुमति लिएर संचालनमा ल्याएका थिए । उनी स्कुल संस्थापक नभए पनि क्रिश्चियनहरुको अनुदान, सहयोगमा संचालनमै ल्याईरहेका थिए । स्कुल अनुमतिका लागि नेपालकै नागरिकता चाहिने भएपछि उनले स्थानीय बीपी आङबुहाङलगायत ८ जना संचालक बोर्ड गठन गरी अनुमति लिएका थिए ।